.9mm pistola nasakmit sa checkpoint

Nadakpan sa checkpoint sa Special Weapons and Tactics (SWAT) sa Lapu-Lapu ang usa ka tawo nga nagdala og 9mm nga pistola.

Ang nadakpan mao si Nathaniel Dano, hingkod ang panuigon, ulitawo nga taga barangay Agus sa maong dakbayan.

Ang team sa SWAT nga gipangulohan ni PO3 Joseph Damasco maoy nakasikop sa suspetsado dihang namatikdan niini nga nagloklok kini sa maong hinagiban.

Walay gipakitang dokumento ang suspetsado nga nagpakitang legal ang pagdala niini nga maoy hinungdan nga gidakop ug gibalhog sa bilanggoan.

Laing nadakpan nga nagdala og armas mao si Arnel Colita,alyas Dongdong ug lumad nga taga Putat, Tuburan, Cebu.

Si Benjie Tagoan, 24 anyos, ulitawo nga tricycle driver sa maong lugar maoy unang nakamatikod dihang nahimo niining pasahero ug gipakita ang armas nga kalibre 38.

Nagdali kini sa pagpangayog panabang kanila ni Rey Flores, Rustico Albano ug Nasarino Guardiano nga mga barangay tanod sa maong dapit nga maoy hinungdan nga kini gisikop.

Ang kasong kalapasan sa Republic Act 8294 kun ilegal nga paghupot og armas ang kasong gipasaka batok sa maong mga dinakpan kinsa pulos kini gitanggong sa bilanggoan.