Armas sa Citom ok — Melvin

Dili mosupak si Cebu City Police Director Supt. Melvin Gayotin sa planong pag-isyu og armas ngadto sa mga sakop sa City Traffic Office Management ug mga barangay tanod, apan gikinahanglang dunay bug-at nga silot nga ipahamtang sa mga abusadong mogamit niini.

Si Gayotin mitug-an sa Banat News nga base sa iyang kasinatian dihang siya pay hepe sa Traffic Group sa dakbayan ang mga traffic enforcers sagad na kaayong abusahan sa mga drayber ug gani hulgaon pa ilang kinabuhi.

Daan nang mipadayag si Mayor Tomas Osmeña sa iyang pag-uyon sa maong plano human sa nahitabo kang PO3 Allan Magalso kinsa gipusil diha sa dalan Katipunan, Labangon ning dakbayan duha na ka semana ang nakalabay.

Si Magalso gihulagway nga kugihan sa pagpanakop sa mga abusadong drayber ug gituuhang ang suspek sa pagsuway og patay kaniya drayber ra usab.

Matud pang Gayotin nga ang legalidad sa pag-isyu sa maong mga armas adto nalang sa mga labaw'ng opisyal sa kapolisan maoy padesisyonon.

Kaniadtong si Gayotin pay hepe sa Traffic Group iya nga gisugyot ang maong lakang gumikan sa mga pagpanghulga sa ubang mga motorista sa iyang mga sakop.

Samtang kabahin sa mga tanod isip tigbantay sa kalinaw sa mga barangay ang armas nga sa pagkakaron gidili kanila gumikan usab sa kadaghan og mga reklamo kabahin sa pagpangabuso kaniadto sa ubang mga tanod.

Matud pang Gayotin una pa armasan ang maong mga tawo ipailawom una sila sa hugot nga pagbansay-bansay ug dunay bug-at nga silot alang niadtong mapamatud-ang niabusar.

"Dunay disciplinary action gyud ana,it is easier to dismiss this people kay mga contractual ra man ni sila (CITOM)," asoy pang Gayotin.