Gayotin: Hinaut may resulta na's imbestigasyon

Nanghinaot si Cebu City Police Director Melvin Gayotin nga karong adlawa ug ugma duna nay klarong resulta nga motumaw sa imbestigasyon sa pagpatay sa testigo ni Kongresista Antonio Cuenco nga si Ananias Dy.

Sa pagkakaron gibutyag sa kapolisan nga hanap pa sila kung unsa ang motibo sa pagpatay kang Dy niadtong Sabado sa gabii diha sa dalan Salvador, Labangon ning dakbayan diin duha ka tawo ang mibanhig kaniya.

Matud pang Gayotin lakip sa ilang gisubay mao ang posibilidad nga dunay gikaaway nga tawo si Dy nga maoy hinungdan sa pagpatay kaniya.

Samtang usa sa gitan-aw sa mga imbestigador mao ang posibilidad nga may kalambigitan sa pagtestigo ni Dy ngadto sa congressional inquiry niadtong Oktubre 2001 batok sa magsuong Peter ug Wellington Lim.

Ang duha daan nang mihimakak niini sumala pa sa iyang manlalaban nga si Atty. Oliveros Kintanar kinsa mipadayag usab sa The Freeman niadtong milabay'ng mga adlaw nga di niya tugutan nga imbitahan ang iyang mga kliyente gumikan kay duna na silay di maayong kasinatian sa imbitasyon.

Dunay plano ang kapolisan nga imbitahon ang mga tawong ilang gidudahang makahatag og katin-awan sa maong kaso apan mipadayag si Gayotin nga dili nila pugson ang tawong dili motungha sa ilang imbitasyon sanglit di kini compulsory.

"The investigation will continue even without their presence, pero mas makatabang unta kung motungha sila aron makahatag og dugang impormasyon pero basta solid ang atong mga ebidensya atong idiretso og file ang kaso," asoy pang Gayotin.

Usa sa mga imbestigador sa Homicide Section nga di magpahingalan ang mibutyag nga mipadayag og kaandam ang ilang mga testigo nga molagda sa ilang mga testimonya aron motestigo kung madakpan na ang gunman ug positibo nilang mailhan.