Mikiha'g rape sa Koreano mipatim-aw

Mitunga sa korte ang katabang nga mitumbok sa usa ka Koreano nga milugos kaniya sa milabay'ng Abril ning tuiga atol sa hearing sa sala ni Mandaue City Regional Trial Court Branch 56 Judge Agustine Vestil sa milabay'ng hapon.

Human sa pipila ka hugna sa hearing nga wala mopakita ang biktima sa korte batok ni Yang Bing Yung sa kasong pagpanglugos, kalit lang mibutho sa korte sa miaging hapon ang biktima.

Matud pa ni Mandaue City Assistant Prosecutor Wilfredo Panganduyon human nila masayri nga anaa ra sa Olango, Aloguinsan ang 20-anyos nga biktima sa Koreano ila dayon kining gipadad-an og subpoena alang sa pagtambong sa hearing niadtong Hulyo 3, apan napakyas kini hinungdan sa pagluwat og warrant of arrest ni Vestil.

Matud ni Panganduyon gumikan sa maong warrant ang biktima kuyog ang iyang abogado mitunga sa iyang buhatan alang sa pagpalibkas sa maong warrant ug sa saad nga motunga sa sunod nga hearing.

Atol sa hearing sa milabay'ng hapon sa sala ni Vestil unang gipresentar sa prosekusyon ang doktor sa Vicente Sotto Memorial Medical Center nga si Dra. Madeline Amadora nga mitestigo mahitungod sa resulta sa iyang paghiling sa biktima.

Kahinumdoman, sa dihang gipalingkod na sa witness stand ang 20-anyos nga biktima kini hugot nga mipadayag sa iyang pagsibog sa pagpasaka og kaso batok ni Yang gumikan kay nahasol na siya sa maong kaso ug wala nay interes sa pagpadayon niini.

Atol sa pagpangutana ni Vestil sa hinungdan sa iyang pag-atras sa kaso, ang biktima mipadayag nga gumikan sa saad nga pakaslan siya sa maong Koreano nga wala matuman hinungdan sa iyang pagpasaka og kasong pagpanglugos batok ni Yang.

Giangkon usab sa biktima nga kanunay na silang magkuyog og katulog ni Yang sa wala pa mahitabo ang pagpasaka sa maong kaso.

Gumikan niini, gihatagan ni Vestil ang prosekusyon og depensa sa paghatag sa ilang formal offer sa mga ebidensiya kalabot sa maong kaso ug si Atty. Owen Alguso, abogado ni Yang gihatagan usab og higayon ni Vestil sa pagpadayon sa ilang motion to bail sa sunod nga hearing sa Agusto 24 ning tuiga.

Kahinumduman usab, ang biktima miluwat og affidavit of desistance apan wala kini tagda sa korte human nga wala kini mopakita sa pipila ka hearing alang unta sa pagsuta kun wala bay hulga nunot sa pagsibog sa biktima sa kasong pagpanglugos batok sa Koreano.