Suspek sa panulis sa mga Indian nasikop sa Talisay

Suspetsadong tulisan sa mga Indian national nasikop sa mga polis sa Talisay niadtong Sabado sa kaadlawon diha sa Sitio Neighborhood Barangay, Talisay.

Nagtingkagol karon diha sa Talisay Detention Cell si Rey Delacuesta Rosales, 34, taga Sityo Kalubihan, Nonoc Barangay Tabunok.

Si Rosales nasikop sa kapolisan dihang usa ka residente sa sitio Neighborhood mitaho sa mga polis nga mianha ang suspetsado sa lugar nga adunay gidalang pusil.

Nasakmitan sa mga polis gikan ni Rosales ang usa ka .357 rebolber ug tulo ka buhing bala niini.

Si PO2 Juville Bacarizas polis sa Talisay nagkanayon kagahapon sa pakighinabi niini sa Banat News nga si Rosales usa sa mga suspetsado sa pagpanulis sa mga Indian national ug nasikop na nila kini kaniadto.

Gidudahan sa mga polis nga si Rosales adunay laing gipanid-an nga Indian nga giplanohang biktimahon na usab niini.

Si Rosales mag-atubang og kasong kalapasan sa Akta Republika 8294 kun illegal possession of firearms nga ipasaka sa kapolisan sa Talisay batok kaniya.