PNP, AFP gimando maghiusa vs terorismo

Gimanduan sa National Anti-Terrorism Coordinator, Anti-Terrorism Task Force ang Philippine National Police ug Armed Forces of the Philippines alang sa joint law enforcement operation.

Kini nunot sa gikatahong tinguha sa mga terorista nga molusad og mga pagpamomba ug pagpamatay sa mga opisyal sa National Capital Region atol sa pagpadangat ni Presidenti Gloria Macapagal Arroyo sa iyang State of the Nation Address karong Hulyo 24 ug sa anibersaryo sa 9/11 bombing.

Nunot niini ang ATTF nilusad sa maong joint law enforcement operation tali sa PNP ug AFP aron pagpakgang sa maong plano.

Sa kamanduan nga nadangat sa Police Regional Office, gipahimangnoan ang tanang pwersa sa kapolisan nga mopatuman og mga lakang nga masanta ang kalihukan sa mga terorista sa tagsatagsa ka lugar.

Gimanduan usab ang kapolisan nga hugtan ang intelligence monitoring ug pagmatngon kanunay sa ilang trabaho.

Gikinahanglan ang koordinasyon tali sa kapolisan ug militar sa tanang operasyon nga ipatuman ug pinasubay sa balaud nga walay tawhanong katungod nga malapas.