Asawa miluba sa bana

Asawa ang miunay og dunggab sa iyang bana human sa ilang mainiton nga panaglalis nga misangko sa pagpamatid ngadto sa ilang duha pa ka bulan nga anak babaye.

Nahitabo ang pagpanunggab niadtong Sabado alas 6 sa gabii sa Siocon, Bogo.

Ang nadunggaban naila nga si Norman Sinadhan, 26, nanimuyo sa susamang lugar.

Ang asawa giila nga si Rowena Jarantilla 24, lumad nga taga Panglao Bohol.

Si Rowena sa pakighinabi sa Banat News kagahapong adlawa pinaagi sa telepono sa Bogo Police Station nagkanayon sa wala pa mahitabo nag-inom sila og tuba uban sa ilang silingan.

Giangkon ni Rowena nga nakainom siya og gamay niadtong tungora apan dili daghan.

"Ang akong bana maoy labihang huboga kay gipainom pa man siya sa lain," matud ni Rowena.

Pagkataudtaod mibalik ang iyang bana og didto na nagsugod ang ilang panaglalis kay matud pa niya wala angkona ni Norman (bana) ang ilang duha ka bulan nga anak babaye kon anak sa laing lalaki.

Matud ni Rowena nga naigo sa ulo ang iyang anak nga naghigda human patiri ka usa ka higayon.

Iyang gidala ang duha ka mga anak babaye didto sa iyang ugangan aron paglikay sa kasamok tali sa iyang bana nga hubog, apan miapas kini nga nagdala na og kutsilyo.

Nahitabo ang linayugay og iyang nakuha ang kutsilyo sa bana, dayong hansak nga miigo sa tiyan niini.

"Nalimot nako sa akong kaugalingon diha pay kahoy nga iyang gidala gud, nalupig lang siya nako sa kusog kay hubog man" dugang asoy ni Rowena.

Si PO3 Hazel Jugasan sa Bogo miingon nga depende sa mga kabanay kon pasakaan nila og kaso si Rowena.

Si Norman daling gidala sa mga ginikanan sa Bogo District Hospital, apan gibalhin lang dayon sa tambalanan dinhi sa dakbayann sa Sugbo gumikan sa samad nga iyang naangkon.