Atol sa press conference kagahapon sa udto gipahibalo ni Osmeña nga nakahukom siya nga dili na i-renew ang kontrata nila ni Charina Semilla, Rodulfo Petallar ug Reynaldo Porca gikan karong bulana hangtud sa Disyembre human nadiskubrihan sa mayor nga nakasugat og kasungian ang maong mga kawani diha sa ilang departamento nga gialagaran.
Wala idetalye sa mayor kun unsang klase sa kasungian ang gilambigitan sa maong tulo ka kawani apan gibutyag ni Atty. Ralph Sevilla, officer in charge sa Human Resource Development sa City Hall nga ang maong tulo ka kawani mao kini mimaniobra sa pag-peke sa ilang mga appointment ug sa payroll niini aron makobra nila ang suholan.
Ang maong mga kawani nalakip kini sa unom ka mga kawani nga nasakpang nakakobra sa ilang suholan niadtong Enero 15 bisan ug wala pa molusot ang ilang renewal sa ilang appointment niadtong higayona.
Sa unom ka mga kawani duha niini gitaktak dihadiha ug ang usa niini nga si Angelo Manapsal mao lay gi-reinstate sa katungdanan samtang ang nahisgotang tulo ka kawani gipaubos sa imbestigasyon.