Lolo napantok sa karsada, namatay

Namatay ang usa ka 81 anyos nga lalaki human mapantok ngadto sa kilid sa konkretong karsada ang ulo niini human kini madasmagi og motorsiklong gikargahan og mga karne diha sa dalan Boromeo, Kalubihan ning dakbayan niadtong Sabado sa buntag.

Gideklarar nga dead on arrival ang biktimang si Nasario Sinamban, residente sa dalan P. del Rosario ning dakbayan human kini madasmagi sa usa ka motorsiklong gimaneho ni Pedro Artajo Romero, 19, molupyo sa dalan dela Concepcion, Pasil ning dakbayan.

Matud pa ni PO1 Edgardo Becoy sa Traffic Group sa Cebu City Police Office sa pakighinabi sa telepono ang biktima base sa imbestigasyon kasamtangang mitabok sa nahisgutang dalan ug wala makabantay sa nagpadulong nga motorsiklong Honda nga may plakang YM-4743 nga gimaneho ni Romero.

Gumikan sa kakusog sa pagbangga nalagpot si Sinamban sa sementadong agianan sa mga tawo diin ang ulo niini napantok.

Daling gidala sa Cebu City Medical Center si Sinamban apan gumikan sa grabeng pagkapantok sa ulo niini patay na kining nadangat sa maong tambalanan.

Ang suspek inubanan sa iyang inahan nga si Julieta mitahan sa iyang kaugalingon ngadto sa kapolisan.