Kagahapon si South District Representative Antonio Cuenco mi-offer sa iyang tulo ka bulang sweldo alang niadtong makatabang sa pagpadakop sa mastermind sa pagpatay kang Dy.
"Kinahanglan gyud subayon og kinsay mastermind," asoy pang Cuenco.
Si Cuenco dihang gipangutana kung duna bay kalambigitan sa pagtestigo ni Dy batok sa magsuong sila si Peter Lim ug Wellington Lim ang kamatayon ni Dy miingon nga dunay dakong posibilidad tungod kay naa ang motibo.
Si Dy mitestigo batok sa Lim brothers niadtong Oktubre 2001 sa gihimong congressional inquiry kalabot sa drogas, apan bisan paman sa nakitang motibo si Cuenco mibalibad sa pagtumbok gyud sa duha nga maoy utok sa maong krimen.
Ang manlalaban sa duha ka Lim nga si Atty. Oliveros Kintanar sa pakighinabi sa The Freeman miangkon nga di gyud kalikayan nga pasanginlan ang iyang mga kliyente.
Hinuon mipadayag si Kintanar nga dili niya isumitir ang duha alang sa imbestigasyon sa kapolisan kabahin sa kamatayon ni Dy gumikan kay natagam na siya kaniadto sa mga imbitasyon.
'Di ko mosugot nga imbestigahon sila, nitagam nako anang invitation,' asoy pang Kintanar.
Matud pa ni Kintanar nga adto nalang sa korte nila tubagon ang kaso kung dunay kihang isang-at batok sa iyang mga kliyente.
Si Sr. Supt. Agustus Marquez sa Regional Investigation and Intelligence Division mibutyag nga dunay himuong case conference karong adlawa aron tukion ang maong kaso.
Kagabii walay bisan usa sa mga opisyal sa CCPO nga mitubag sa tawag sa Banat News aron mapangutana sa dagan sa imbestigasyon apan si Marquez mipasabot nga dunay gihimong case conference ang tanang imbestigador sa maong kaso ug karong adlawa ipresentar kini ngadto sa PRO7.
Si Chief Supt. Silverio Alarcio, Sr. Supt. Lani-O Nerez, Sr. Supt. Marquez, Supt. Melvin Gayotin ug Supt. Labra motuki sa maong kaso karong adlawa.
Matud pang Marquez nga tanang anggulo ilang subayon lakip na ang isyu sa Lim brothers apan miklaro nga dili lang kini nila ipokus sa usa ka anggulo sanglit dunay posibilidad nga dunay tawong nasuko kang Dy.
"Of course dunay mga hungihong ana, kinsa may maka-motivate sa pagpatay niya kundili kadto ra gyung tawong dunay kasuko niya, daghang anggulo dili lang siguro ang Lim brothers," asoy pang Marquez.