Ginikanan ang gibasol tungod sa malnutrition

Matud pa ni Juliet Tutor, ang Regional Coordinator sa National Nutrition Council (NNC-7) nga hangtod nga dili usbon sa mga ginikanan ang ilang kinaiya, magpabiling dili maugkat ang lalawigan sa Cebu gikan sa pagkanumero uno niini sa pagkadaghan og kabataan nga kuwang sa pagkaon o malnourished sa tibuok nasud.

Si Tutor nagkanayon nga isip kasaulogan sa "nutrition", kining buwan sa Hulyo ilang gihagit ang mga ginikanan nga aron mahimong "bright" ang ilang anak, kinahanglan hatagan kini og maayo ug balanse nga pagkaon.

Pinaagi sa tema nga "Kumain ng Right Para Magiging Batang Bright" anhi masukod ang kakugihan sa ginikanan ug putlon na ang kinaiyang pagkataspokan.

Matud pa ni Tutor nga ang tapolan nga ginikanan, dili na makapabawon og hustong pagkaon sa ilang anak nga moeskuyla.

Dili na gani makapakaon niini sa sayong kabuntagon kay dugay man momata gumikan sa kakuwang sa pag-atiman sa ilang anak.

Gitambagan ni Tutor ang mga ginikanan nga aron makakaon matag adlaw ang bata og husto ug sustansyadong pagkaon, kinahanglang pabawnan kini og kan-on nga may sud-ang isda ug utanon ug prutas ngadto sa eskuylahan.

Ang taspokan nga ginikanan, kuwarta mao ray ipabawon sa bata ug didto sa eskuylahan mga "junk foods" nga way sustansiya maoy paliton sa bata.

Ang ubang hinungdan nga dili na makakaon sa hustong pagkaon ang mga bata mao ang pagkalingaw nila sa mga salida sa telebisyon, computer ug uban pa, kay gipasagdahan lang sa mga ginikanan.