Pagtukod og CAFGU giduso na sa DND

Pormal na nga naduso ni Gobernador Gwendolyn Garcia ngadto sa kalihim sa depensa Avelino Cruz Jr. ang iyang suwat kabahin sa plano sa kagamhanan sa probinsiya sa pagtukod og auxiliary CAFGU.

Gitataw ni Garcia nga gihangop ni Cruz ang iyang hangyo ug mitugot kini nga magtukod ang probinsiya og duha ka pundok sa CAFGU.

Ang maong mga CAFGU idestino sa habagatan ug amihanan nga bahin sa probinsiya para moayuda sa pakigbatok sa insurhensiya.

Ang mga mosulod sa CAFGU moagi una og screening og kinahanglan nga gi-endorso sila sa konseho sa kahapsay ug kalinaw sa Local Government Unit (LGU) diin sila maggikan.

Ang military mopahigayon usab og training isip screening sa mga mosulod og CAFGU una sila makasalmot sa 120 ka adlaw nga actual training.

Kahinumduman nga ang probinsiya nagplano sa pagtukod og "anti insurgency task force" kinsa si Gracia mao mismo ang mangulo niini.

Ang maong task force langkuban sa tulo ka co-chairman nga mao ang Provincial Director sa Cebu Provincial Police Office (CPPO), Group Director sa Regional Mobile Group (RMG) 7 ug Battalion Commander sa Philippine Army Unit nga gikan sa 78th Infantry Battalion.