Duha naghikog sa South

Duha ka tawo ang namatay human maghikog pinaagi sa paghigot og pisi nga nylon sa ilang liog.

Nahitabo kini sa managkalahing takna ug dapit sa lalawigan sa Sugbo niadtong Biyernes.

Ang una niini mao ang nahitabo sa Calajoan, Minglanilla nga nadiskubrehan alas 8 pasado ang takna sa buntag.

Ang biktima mao si Felimon Amodia Sr., 59 anyos, minyo nga nagpuyo sa maong dapit.

Nadiskubrehan kini ni Joan Fernandez, hingkod ang panuigon ug pag-umangkon sa biktima.

Si PO2 Avelino Celoria sa Minglanilla Police Station nga gikahinabi sa Banat News miingon nga nagbitik sa liog og pisi nga nylon ang biktima.

Gihigot kini sa sagbayan sa sulod sa panimalay nga gipanag-iya sa igsoon niining babaye ug nadiskubrehang patay na.

Ang ikaduha nahitabo sa Consolacion, Dalaguete nga nadiskubrehan patay na usab alas 3 pasado ang takna sa hapon sa mao gihapong adlaw.

Giila ang biktima nga mao si Vicente Becbec, 67 anyos, minyo ug nagpuyo usab sa nahisgotang dapit.

Si PO1 Cheilo Quimad sa kapolisan sa maong lungsod nga gikahinabi sa Banat News miingon nga pisi gihapong nylon ang gigamit sa pagbitik sa liog sa biktima dhang nakit-an sa humablos niining si Alberto.

Sumala pa ni PO1 Quimad nga sila si SPO3 Cristopher Requina misugyot nga ipa-autopsy ang patay'ng lawas gumikan kadudahang bun-og nga nakita sa iyang nawong ug dugo nga nanggawas sa dunggan.

Kini pagahimoon alang gayod sa pagsuta sa hinungdan sa kamatayon sa biktima. — Uban sa taho ni Rey Pasaporte