Mga militanteng pundok wa kaduol ni Ate Glo

Napakyas ang mga militanteng grupo sa ilang tinguha nga paghimo unta og protest rally duol sa giugmad nga Cebu International Convention Center (CICC) sa reclamation area sa dakbayan sa Mandaue kagahapon sa buntag atol sa pagbisita ni Pres. Gloria Macapagal- Arroyo.

Nagtinguha unta ang mga cause-oriented group sa pagpahigayon og protest rally sa maong dapit dihang ilang nasayran nga mahidangat si Arroyo sa maong dapit alang sa paghimo'g pakisusi sa nagpadayong giugmad nga CICC.

Apan si Mandaue City Director Police Sr. Supt. Eduardo Catabas higpit nga mibutang og mga polis sa mga dalan nga nagpaingon sa CICC diin didto si Arroyo uban nila ni Gobernador Gwendolyn Garcia ug uban pang opisyal sa Sugbo.

Si Chief Insp. Antonio del Fierro sa Mandaue City Police Office (MCPO) nga maoy ground commander sa kapolisan pag-secure sa maong pagbisita ni Arroyo kagahapon miingon nga higpit nilang gihatagan og seguridad ang maong lugar sulod sa 24 oras.

Gipadayag ni del Fierro nga si Catabas midestino gayod sa nagpadayong giugmad nga CICC og mga polis nga magpuli-puli sa pagbantay sa adlaw ug gabii.

Matud pa niya nga ang kapolisan sa dakbayan ug Presidential Security Group (PSG) nga mihatag og seguridad sa maong dapit sa pagduaw ni Arroyo sa CICC kagahapon giabagan usab sa mga sakop sa Regional Mobile Group (RMG-7) ug mga trainee gikan sa Regional Training School (RTS) sa Police Regional Office 7.