Nadiskubrihan sa tag-iya nianang mga alas 6 sa buntag sa dihang iya na untang lawogan ang iyang mga manok lakip na ang gikaon sa dakong sawa nga gikatakdang itari karong umaabot adlaw'ng Domingo.
Ang tag-iya mao si Boy Calledo, hingkod ang panuigon, residente sa maong lugar.
Segun sa asoy ni Calledo nga iyang namatngunan pagka kadlawon ang kasaba sa iyang mga manok sulod sa tangkal apan wala lang niya panumbalinga sa pagtuo nga diha nay mga manok nga mitugpa gikan namatog.
Ang tangkal sa mga manok ni Calledo iya kining gipamutangan og mga screen isip abung, apan nakalusot gayud ang maong sawa ug gikaon ang igtatari.
Dako na lang niyang kahikurat sa dihang iya nang gidad-an og pagkaon pagkabuntag.
Nakit-an ni Calledo nga nagluko na ang sawa ug balhibo nalang sa manok ang nahabilin diha sa tangkal.
Si Kapitan Eliodoro Sanchez sa Busay maoy nangunay og panawag sa Department of Environment and Natural Resources (DENR) ngadto ni Lily Caburatan aron kapangitaan og pamaagi unsaon pagkuha ang sawa.