Kahinumduman nga ang maong mga bata gisikop niadtong Mayo 2 sa grupo sa Provincial Intelligence and Investigation Branch (PIIB) ug nadetiner sa Cordova Detention Cell.
Si James Potot nagkanayon kagahapon sa mga tigbalita nga moduso siya og kaso sa Ombudsman batok sa mga polis ug ni Mario Cabahug kinsa maoy mipasaka og kasong pagpangawat batok sa mga bata.
Apan gi-dismiss sa korte ang kaso nga gisang-at ni Cabahug batok sa mga bata tungod sa kaluag sa ebidensiya.
Si Cabahug mipasangil sa mga bata nga nangawat sa mga kabilya nga mikabat tanan sa P9 mil diha sa iyang beach resort nga nahimutang sa nahisgutang lugar.
Dihang nahitabo ang insidente si Cabahug dili na maoy tag-iya sa maong beach resort tungod kay iya na kining gibaligya sa usa ka Korean national ug ang tanang estraktura nga gitukod sa lote gipalarot na kini sa bag-ong tag-iya tungod kay tukoran kini og tunghaan ug simbahan.
Gibutyag ni Potot nga ang maong mga bata gikan nagduwa og basketball ug misuroy kini sa lugar apan kalit kining gisikop sa mga polis sa PIIB nga wala mo-coordinate sa kapolisan sa Cordova ug sa barangay.
Si Potot midungag nga usa ka pakaulaw sa mga bata ang gibuhat ni Cabahug ug sa mga polis.