Marijuana giibot sa 78IB

Gipangibot sa mga sakop sa 78th Infantry Batallion 3rd Infantry Division ang mga tinanom nga marijuana sa Magtagubtob, Danao sa milabay'ng hapon.

Base sa impormasyon ni 2Lt. Walter Tagardon, team leader sa 78th IB nga nadestino sa bukirang bahin sa Danao, samtang nagpahigayon sila og patrolya sa maong dapit ilang nasigpatan ang mga tinanum nga marijuana sa Magtagubtob hinungdan nga ila kining gitaho sa kapolisan sa Danao.

Atol sa joint operation sa kapolisan sa Danao ug sa 78th IB ilang gipangibot ang 75 ka punuan sa marijuana ug gidala sa Danao police station.

Hangtod ning pagbalita wala pa masayri sa mga otoridad kun kinsa ang nagtanum sa maong marijuana ug ang tag-iya sa yuta nga gitamnan. Gikalipay usab sa kapolisan sa dakbayan sa Danao ang gihimo nga koordinasyon sa mga sakop sa 78th IB aron masumpo ang mga tawo nga nagtanum sa mga marijuana sa bukirang bahin sa dakbayan sa Danao.