CCPO text ok ang reaksiyon

Positibo ang reaksyon sa publiko sa una pa lang nga adlaw sa paglusad sa 'text a crime' project sa Cebu City Police Office kagahapon gumikan sa nagpusok-pusok nga mga impormasyong maisip nga dako og bili alang sa pagkumbate sa krimen dinhi sa dakbayan.

Kagahapon sa buntag dunay dili momenus 25 ka mga text messages ang nadawat sa operations section sa CCPO, sagad kanila mga nagpadangat og mga reklamo kabahin sa nagpasad nga mga rugby boys, mga namaligya og drogas.

Duna say nadawat nga text ang CCPO kabahin sa operasyon sa gidudahang cybersex den sa amihanang bahin sa dakbayan sa Sugbu nga ila na karong gisubay.

Ang mga text nga madawat sa CCPO gipasa ngadto sa mga hingtungdang mga police station aron maoy mohimo sa pagberipikasyon ug panid-an ang gireklamo.

Duna say mga nagbinuang sa text nga nangayo og load ug makig-textmate. Apan daghan usab ang mipasalamat ug midayeg sa programa sa CCPO, usa na niini ang nagpailang usa ka abogado.

"Atong hangyuon ang komunidad nga dili magbugal-bugal sa atong text line kay para man ni sa ila," hangyo pa sa direktor.

Giplano karon ni Gayotin nga isuhestiyon ngadto sa konseho nga kung mahimo hatagan og reward ang mga texter nga dunay mahatag nga dakong impormasyon kontra krimen.

Hinuon giklaro ni Gayotin nga dili ibutyag ang mga pangalan ug numero sa cellphone sa mga impormante aron masigurong dili sila mapasipad-an.

Si Gayotin naglaraw nga magbutang unya og mas labing epektibo nga pamaagi aron pagdawat sa mga impormasyon pinaagi sa pag-install og impormasyon sa mga impormanteng matawag nga "A1" ang impormasyong ilang gipanghatag aron di na magkinahanglan og beripikasyon.