Calderon maoy bag-ong PNP chief

Gihangop sa Police Regional Office-7 ang pahibawo ni Presidenti Gloria Macapagal Arroyo labot sa paghulip ni Deputy Director General Oscar Calderon isip bag-ong hepe sa Philippine National Police.

Si Calderon maoy mohulip kang PNP Director General Arturo Lomibao kinsa moretiro na sa katungdanan karong adlawa.

Matud pa ni PRO-7 deputy regional director for administration, Sr. Supt. Ronald Roderos, nga gawas sa taas na nga katuigan sa pagserbisyo ni Calderon sa PNP, siya usab ang ikaduhang labing taas nga opisyal sa kapolisan sa nasud isip deputy director for administration.

Si Calderon usab ang kasamtangang pangulo sa Police Anti-Crime Emergency Response ug Senior Officers Promotion Board.

Gradwado si Calderon sa Philippine Military Academy sa tuig 1973.

Gihulagway ni Roderos nga sama og kinaiya si Calderon kang Lomibao sa pagdumala sa iyang mga sakop sa PNP.-Gregg M. Rubio