'Kawatan' og CDI, napusilan

Grupo sa mga kawatan og CDI sa multicab ang nag-operate sa habagatang bahin sa lalawigan sa Sugbo nga magsakay og multicab ang nadakpan sa kapulisan ug ang usa niini napusilan sa polis sa Ginatilan.

Nahitabo kini kagahapon sa buntag sa alas 6 pasado ang takna diha sa may Barangay Guiwanon sa maong lungsod sa dihang nisuway kini pagsukol sa mga awtoridad ug ang usa nibunot og armas ug mao hinuon ang napusilan.

Nagsakay ang lima og multicab nga may plaka GXB 110 nga adunay rota Mepza ug merkado nga gimaneho ni Romeo Lumigday, 26, lumad nga taga Dumanjug ug kasamtangang nagpuyo sa Lapu-Lapu.

Samtang ang mga sakay niini giila sa kapulisan nga sila si Matt Baguio, 39, minyo, taga Cordova, Joel Garvia, 21, ulitawo taga Barangay Saac Lapu-Lapu, Albert Cataluna, 20, ulitawo ug Jelord Alliazer, alyas "Albert" 23, Lapu-Lapu.

Si SPO1 Felixberto Pidra maoy nakapusil ni Lumigday sa dihang nisuway kini pagbunot sa iyang 38 kalibre diha sa hawak, hinungan nga gipusil kini sa M-14 ni Pidra nga naigo sa tuong bukton.

Si SPO4 Daniel Manlocot Comision Jr. OIC sa Ginatilan Police sa pakighinabi sa Banat News ang miingon nga adunay nakakita sa maong grupo sa Alegria nga naay gitangtang sa sakyanan nga nagparking daplin sa karsada, nga maoy nakapahibaw kanila kay matud pa nagsakay kini og multicab.

Ang usa ka sakop ni SPO4 Comision maoy nakakita nga didto mohunong sa nahisgutang lugar hinungdan nga gisita kini apan misukol si Lumigday.

Matud ni SPO4 Comision nga nalandig sa tambalanan si Lumigday sa Don Mariano Cuenco Memorial Hospital apan paglabay sa pipila ka oras, nakadawat siyag tawag sa usa sa mga doktor nga nakabsan sa kinabuhi si Lumigday.

Nakuha sa kapulisan diha sa multicab nga gisakyan sa mga suspek ang 6 ka CDI, tulo ka ligid, upat ka starter ug mga assorted nga pisa ug mga tools.