Seguridad isentro sa PRO-7

Isentro sa Police Regional Office-7 sa pagpakabana sa katawhan sa seguridad sa umaabot Asean Summit ang kalihukan sa pagsaulog sa Police Community Relations Month ning buwan sa Hulyo.

Kini ang gipahibawo nilang PRO-7 deputy regional director for administration, Sr. Supt. Ronald Roderos ug Supt. Alexander Abadinas, ang hepe sa Regional Police Community Relations Division, atol sa paglusad sa PCR Month kagahapon.

Matud pa ni Roderos nga ilang ipasabot ngadto sa komunidad sa kamahinungdanon sa papel sa katawhan sa pagpatunhay sa kalinaw ug kahusay lakip na sa pagpakigbatok sa insureksiyon.

Gipahibawo usab ni Abadinas nga ang tanang kalihukan sa PCR Month itumong sa pagpalig-on sa pagsalig sa katawhan ngadto sa kapolisan.

Giklaro usab ni Jose Concepcion Jr., hepe sa administrative services sa National Police Commission-7 nga maoy nagpasiugda sa PCR Month, nga ipasabot pag-ayo ngadto sa katawhan ang mga serbisyo nga ihatag sa kapolisan.

Samtang gipadayag usab sa mga tinugyanan sa PCR sa matag presinto sa kapolisan sa dakbayan sa Sugbo nga ang kakuwang sa pondo nga ilang magamit sa mga pulong-pulong lakip na sa sakyanan nga magamit sa pagbisita sa komunidad ang usa sa ilang problema.

Giangkon ni Abadinas ang maong mga problema dungan ang pasalig nga pangitaan kini og kasulbaran.

Gawas sa seguridad sa Asean Summit, ang kalihukan sa PCR Month naglangkub usab sa mga pagbisita sa kapolisan sa mga pangpublikong tunghaan, bloodletting, pulong-pulong, seminars, emergency drills, clean and green drive ug padayung edukasyon sa kapolisan.