Italyano gikiha sa iyang kasosyong Italyano

Gipasakaan og kasong estafa sa korte ang usa ka Italian national ug ang uyab niini kinsa gipasanginlang nangilad sa ilang kasosyo sa negosyo nga usa usab ka Italian national.

Si Renato Benedetti mipasangil ni Alfio Giarlotta ug sa uyab niini nga si Teresita Schaap nga mibalhin sa ngalan sa ilang negosyo nga wala siya pahibaw-a.

Si Benedetti ug Giarlotta kasosyo sa Café Le Grand Soleil nga nahimutang diha sa dalan F.Ramos niining dakbayan ug si Schaap industrial partner nilang duha kinsa maoy ilang gipadumala sa maong resto-bar.

Ang ngalan sa maong negosyo nakarehistro sa pangalan ni Schaap.

Mibuhi og 15,000 Euro o P1,005,000 kun mailisan sa peso matag usa kanila si Benedetti ug Giarlotta apan kahago lang ang tugbang ni Schaap.

Modawat og 40 porsyento matag usa kanila si Giarlotta ug Benedetti sa ginansiya ug 20 porsiyento lang ang madawat ni Schaap.

Apan sa milabay'ng mga buwan sa operasyon ni Giarlotta ug ni Schaap sa maong resto-bar gihatagan nila si Benedetti og P500,000.

Matud ni Benedetti sa iyang reklamo nga gipasaligan siya ni Giarlotta ug Schaap nga ulian sa P650,000.

Apan matud niya wala siya pahibaw-a nga gibalhin ang ownership sa Café Le Grand Soleil resto-bar nga dunay value nga P2 milyones ngadto sa usa ka Basilica Saavedra igsuon ni Teresita Schaap ug ang ngalan niini karon mao na ang Cebu Travel Café ug hangtud karon padayon pa ang operasyon niini sumala niya naalkanse siya og P250 mil sa signing privilege ug P400 mil sa iyang investment.

Si Benedetti mipasangil usab nga si Schaap migamit og tulo ka babaye aron mopasaka og kasong acts of lasciviousness batok kaniya niadtong Marso niining tuiga apan ang maong kaso pulos na-dismiss sa korte.

Si Brendalyn Castillo, 18-anyos, taga Bancasan San Remegio, Cebu usa sa miduso og reklamo nga act of lasciviousness sa Mandaue City Prosecutor's office batok ni Benedetti.

Apan niadtong Abril 10, 2006, si Brendalyn mibali kini pinaagi sa pagluwat og affidavit nga gigamit lang siya ni Schaap batok ni Benedetti.