Balas, graba idonar sa kompaniya sa siyudad

Usa ka iladong kompaniya nga nagbase didto sa Leyte modonar og mga balas ug graba nga ikasagol sa paghimo og aspalto aron itapak sa mga gubaong karsada dinhi sa dakbayan sa Sugbo.

Ang mga tinugyanan sa Department of Engineering and Public Works (DEPW) padayon karong nanapak sa mga gubaong kadalanan dinhi sa dakbayan aron mahapsay nga tan-awon ang mga kadalanan sa siyudad sa Sugbo atol sa pagpahigayon unya sa Asean Summit sa Disyembre nga tambungan sa lainlaing presidente sa mga kanasuran sa tibuok kalibutan.

Si Konsehal Gabriel Leyson, tsirman sa committee on public works local and national funded project mopasar og resolusyon atol sa sesyon sa konseho karong hapon nga mag-awhag sa konseho aron tugotan si Mayor Tomas Osmeña nga makadawat sa 8,000 ka cubic meter sa granulated slag nga isagol sa paghimo og aspalto.

Ang Philippine Associated Smelting and Refining Corporation (PASAR) nga nagbasi sa Isabel, Leyte ni-aprobar sa hangyo sa mga opisyal sa siyudad sa Sugbo nga modonar sa mga biya niining mga balas ug graba.

Apan dunay gamay'ng kondisyon ang assistant to the president sa PASAR Company nga si Thomas Gonzales ngadto sa mga opisyal sa dakbayan sa Sugbo nga dili ibaligya ngadto ni bisan kinsa ang maong mga balas ug graba nga alang sa paghimo og aspalto.

Pagkakaron ang dalan Escario sa Capitol maoy gipaspasan og aspalto aron maanindot ang maong kalsada nga tan-awon unya sa mga langyaw'ng bisita nga motambung sa Asean Summit.