Pagpusil sa polis 75% nang sulbad

Gibutyag sa Homicide Section nga 75 porsyento na ang naabot sa imbestigasyon sa kasong pagsuway og patay kang PO3 Allan Magalso sa Traffic Group niadtong milabay'ng semana.

Usa ka babaye ug duha ka mga lalaki ang giingong nalambigit sa maong kaso, diin ang usa maoy nagmotor nga gunman ug ang babaye ug laing usa pa ka lalaki maoy giingong look-out niadtong pagkahitabo.

Si Inspector Erlando Metante ug SPO1 Jay Yballe sa pakighinabi sa mga tigbalita kagahapon nagkanayon nga duna na silay tulo ka mga testigos nga ilang gihangyo sa pagbarog sa ilang mga testimonya, samtang pirmahanan pa usab ang testimonya ni Magalso kinsa hangtud karon naa pa sa tambalanan.

Dugang pa niini mao ang paghatud unya og mga imbitasyon sa tanang mga drayber nga gikatrokis ni Magalso atol sa pagtuman niini sa iyang trabaho ilabi niadtong usa ka semana una pa siya gipusil sanglit mao ra kadtoy labing duol nga anggulo.

Matud pang Cebu City Police Office Director Melvin Gayotin, ang basehan sa pag-imbitar sa maong mga drayber mao nga dunay naka-identify kanila niadtong mahitabo ang panagtrokis.

Gibutyag ni Yballe nga human sa insidente niadtong gidasmagan sa usa ka PUJ si Magalso ug nagkaguliyang ang mga Traffic Group pagdakop sa mga PUJ nga magbiyahian sa Mandaue duna nay mga lalaking magpangita kang Magalso diha sa ilang balay sa Labangon matag adlaw.

Duha ka tawo usa kanila babaye nakit-an sa mga testigo nga midagan padulong sa highway gikan sa dalan Katipunan diin gipusil si Magalso, giingong dunay nakit-ang armas sa duha.

Sa report sa kapolisan , usa ka lalaking luwan sa usa ka motorsiklo nga nagpurong og bonnet nga kolor brown ang mipusil kang Magalso samtang nagtalikod.

Nagtuo si Gayotin nga kung wala pa makabawos og pusil si Magalso posibleng tiwasan siya sa duha ka mga gidudahang back-up apan nianang pagbawos na sa polis sa miikyas nga suspek giingong midagan na usab ang maong duha ka tawo palayo sa lugar.