Polis gireklamo kay wala modakop

Polis sa Pardo police station gibaharan nga pasakaan og kaso sa ombudsman tungod kay wala mohatag og aksiyon sa pagsikop sa usa ka lalaki kinsa gipasakaan og kasong oral defamation.

Si Edgardo Briones, 44-anyos taga Taboan public market Barangay San Nicolas niining dakbayan mibahad nga moduso og reklamo sa ombudsman batok ni PO1 Glen Aquino polis sa Pardo.

Si Briones sa pakighinabi niini kagahapon sa mga tigbalita mipasangil ni Aquino nga wala mohatag og aksiyon sa iyang hangyo sa pagsikop sa iyang ig-agaw nga si Mario Earl Alegarbes, residente sa dalan Sabellano, Pardo niining dakbayan.

Gibutyag ni Briones nga gipasakaan niya og kasong oral defamation si Alegarbes tungod kay siya ug ang iyang pamilya tawgon og kawatan ug tulisan sa iyang ig-agaw.

Ang maong kaso nasang-at sa sala ni Judge Gil Acosta sa Municipal Trial Court in Cities branch 3 niadtong tuig 2005 ug pagka Enero 17 niining tuiga milusot ang warrant of arrest batok ni Alegarbes.

Niadtong Hunyo 30 sa gabii mianha si Briones sa Pardo Police Station para mangayo og ayuda sa kapolisan para ma-serve ang warrant of arrest batok ni Alegarbes.

Apan matud ni Briones nga gibalibaran siya ni Aquino tungod kay light offense lang ang maong kaso ug tumong nga Biyernes sa gabii mianha sa ilang buhatan ang biktima ug dili pwede makapiyansa ang suspetsado tungod kay walay opisina sa Sabado ug Domingo.

Si Cebu City Police Office acting director Melvin Gayotin sa pakighinabi sa mga tigbalita kagahapon mibutyag nga dunay memorandum kaniadto gikan sa korte nga nagdili sa pagpahigayon og pag-aresto sa mga tawong dunay warrant panahon nga Biyernes sa gabii, Sabado ug Domingo ilabi na kadtong mga kasong gagmay ra kaayo.

Matud pang Gayotin nga gidili ang susamang aksyon gumikan kay walay opisina ang mga korte sa maong mga adlaw ug mapugos ang kapolisan nga itanggong una ang ilang mga dinakpan hangtud sa adlaw'ng Lunes, bisan gamay ra kaayo ang salaod nga nahimo ug gamay ra usab ang kasong giatubang lakip na ang multa.

Gipasabot ni Gayotin nga giabuso na kini karon sa ubang madumtanon nga mga tawo aron silutan ang mga nakasala kanila.