Ang polis giila mao si PO1 Vincent Letigio, 31, ulitawo nga taga Alegria.
Samtang ang mga mikulata kaniya giila sa kapolisan nga mao sila si Marcelino Libato, Windell Cañete, Joven Libato, Larry Pilayo ug Romeo Jimenez susamang nanimuyo sa maong lugar.
Si PO1 Letigio nalandig sa tambalanan human makaangkon og grabeng mga bun-og sa iyang kalawasan lakip na ang nawong niini tungod sa kadaghan sa mga kinumo nga mitugpa diha sa iyang kalawasan.
Sa imbestigasyon sa kapolisan sa Alcantara nasayran nga nagsakay ang bikitma sa iyang motorsiklo gikan sa Alegria ug paingon na unta dinhi sa dakbayan sa Sugbo, apan paghidangat sa maong lugar kalit migawas ang multicab nga gimaneho ni Joven Libato ug mideretso kini paatras padung sa tunga sa karsada.
Si PO1 Letigio nga nakakita sa multicab, iyang giingnan si Joven nga dili maayo ang gibuhat kay mao kini hinungdan sa aksidente ug nagpaila nga usa siya ka polis.
Si PO3 Odever Ludivecor sa Alcantara Police Station sa pakighinabi sa Banat News miingon nga ang upat ka mga estambay kalit lang niduol ni PO1 Letigio dayong sukmag sa nawong ug gitabangan sa pagkulata lakip na ang drayber nga si Joven.
Human nalup-og ang polis ug wala gayud makabawos sa mikulata kaniya, gikuha pa sa usa sa mga suspek ang iyang service firearm nga .45 pistola, usa ka mag ug 9 ka buhing bala.
Ang kapolisan sa Alcantara padayon pang nangita sa lima human misibat.