LPG sa garahian susihon

Gukoron gyud sa kagamhanan sa Talisay City ang negosyanteg taxi kinsa namatigayon og Liquified Petroleum Gas (LPG) nga way permiso diha sa Tabunok, Talisay.

Matud pa ni City Legal Officer Aurora Econg nga dili kini niya katulgan kay ang mga paglapas nga ingon niini maoy makapabangkarota sa gobiyerno.

Matud pa ni Econg nga usa ka ilegal ang pamatigayon ning Juscar Taxi Company nga gidumala ni Paul Lao kay bisan tuod kining iyang tangke sa LPG para lang sa igtutubil sa iyang mga taxi, apan nagkinahanglan kinig permiso.

Ang kapeligro sa sunog ning maong negosyo maoy dakong hulga sa mga molupyo sa palibot diha sa barangay Tabunok, matud ni Econg.

Sayo niini nasayran ni Econg ang ilegal nga pagpundog LPG ni Lao pinaagi sa iyang dakong tangke dihang mireklamo ang mga silingan niini sa kabalaka nga ma-impiyerno unya ang ilang lugar.

Gipasusi dayon ni Econg ang maong lugar ug nasuta nga tinuod ang reklamo sa mga molupyo.

Apan nangatarungan si Lao nga may pagtugot siya sa Department of Labor and Employment Inspection Standard Division nga makamontar og tangke sa LPG diha sa Tabunok.