P4 milyones ang danyos sa sunog sa pabrika sa Liloan

Mokabat sa P4 milyones ang danyos sa sunog nga nahitabo sa usa ka furniture firm nga gi-export ang produkto human ang kalayo kalit lang miulbo nga maoy nakaingon sa pagkaugdaw niini.

Ang nasunog mao ang San Juan Casting Export nga nahimutang sa barangay San Roque sa bukirang bahin sa lungsod sa Liloan.

Si FO3 Roland Capoy sa Liloan Fire Station nga gikahinabi sa Banat News miingon nga ilang nadawat ang alarma alas 7 ang takna sa gabii apan alas 7:30 na sa gabii sila nga nahidangat sa maong dapit ug hingpit nilang nakontrolar ang kalayo sa paglabay sa usa ka minuto.

Dugang pa niya nga ang kalisod sa dalan paingon ngadto sa maong dapit nga nahimutangan sa maong pabrika maoy nakadugay kanila.

Mitubag usab sa maong alarma ang kabomberohan sa lungsod sa Compostela apan naaksidente usab kini sa maong dapit tungod sa kalisod sa pag-agi.

Matud pa niya nga si San Roque Barangay Captain Johnny Cantero nga igsoon sa tag-iya sa nasunog nga pabrika nga si Jovito Cantero ang lakip usab sa mitubag sa maong alarma.

Gipasabot ni F03 Capoy nga ang mga nasunog nga mga ekipo sa maong pabrika maoy nakaingon sa dakong danyos niini.

Ang naghinubrang paggamit sa kuryente maoy nakaingon sa kalit nga pag-ulbo sa kalayo ug walay naangol ug kinabuhing nakalas sa maong insidente.