Tulo ka samad pinusilan sa nagkadaiyang bahin sa lawas ang naangkon sa bana giila nga si Anecito Maquilan Pitogo, 45, minyo, nagpuyo sa maong lugar.
Samtang ang gitumbok nga mipusil sa biktima giila nga mao si Dominador Arrabis, 37, minyo nga taga Barangay Malingin, Daan Bantayan.
Matud pa sa kapolisan nga ang biktima naglakaw paingon na mopauli sa ilang pinuy-anan kuyog ang iyang asawa nga si Elisa.
Ang suspetsado nga si Arrabis giingong nag-atang nang daan diha sa may punoan sa sambag ug armado kini og mubo nga armas.
Paghidangat sa biktima ug sa iyang asawa sa maong dapit, kalit lang gipusil si Maquilan tulo ka mga higayon nga naigo sa lawas niini, nga maoy nakaingon sa iyang hinanaling kamatayon.
Si Dr. Nicomedes Jabal usa sa nikuyog sa mga niresponding kapolisan maoy mideklarar nga namatay gayud si Maquilan gumikan sa samad pinusilan sa iyang lawas.
Sa alas 5:30 kagahapon sa buntag ang suspetsado nga si Arrabis nadakpan atol sa hot pursuit operation sa mga polis diha sa may waiting shed sa Malingin nga nagpaabot og kasakyan nga posibli untang mo-ikyas.