Si Chief Inspector Ambrosio Ibones ang hepe sa TRS sa pakighinabi sa mga tigbalita mibutyag nga ilang gisusi karon kung giunsa pagkahibalo sa mga suspek nga nagdala og P1.2 milyones si Wilson Sabellano,27 ang kolektor sa Nikko Cebu Money Changer.
Matud pang Ibones nga base sa pamahayag ni Sabellano wala kini tukmang oras kun kanus-a mokuha og kwarta sa bangko, ikaduha mao nga dili kaayo ilado ug suok kaayo ang maong money changer kun ang pagkasikat maoy susihon.
"Ang akong gikatingala mao kung si kinsa ang ni-finger (mitudlo) sa iya nga naa siya'y kwarta,"asoy pang Ibones.
Nunot ning mga pangutanaha nagduda usab si Ibones nga posibleng inside job ang nahitabo apan miklaro nga wala nila ikunsiderar nga may kalambigitan si Sabellano sanglit bisan tuod siya maoy kolektor base sa pamahayag niini wala siya'y kalibutan kung pila ang kwartang ipakuha ug ipahatud kaniya sa iyang amo.
Dako usab ang pagtuo ni Ibones nga posibleng gisundan na si Sabellano sa tulo ka mga tulisan diha palang paggawas niini sa bangko una siya gitulis diha sa dayon na niyang pagbalik sa ilang buhatan sa dalan Mango Avenue.
Wala usab iklaro ni Ibones kung mopasaka na sila og kaso ugmang adlawa batok ni Francisco Mancao Ybañez nga giingong usa ka tulisan kinsa gitudlo sa mga testigos ang hulagway diha sa rogue gallery sa kapolisan.