Fr. Belciña gipaabot mosurender sa polis

Hangtod karon sa pagsulat ning balita (kagahapon) pabilin gihapon gipangita sa kapolisan sa Danao si Fr. Joey Belciña ug wala usab mopatim-aw sa buhatan sa kapolisan.

Si PO3 Reynaldo Perez sa Danao Police Station nga nahinabi sa Banat News kagahapon nagkanayon nga gikan sa buntag pa silang pinaabot nga motunga si Fr. Belciña aron mohatag og piyansa nga P200 mil.

"Didto mi gahapon sa Archbishop Palace kay among dakpon ang pari, kay naa may warrant of arrest among dala, pero wala man didto si Fr. Ting raman tong usa," asoy ni PO3 Perez.

Uban ni PO3 Perez sila si SPO3 Alfredo Tapia ug SPO1 Jaime Meca pulos nadestino sa Danao Police Station.

"Niingon man gud to si Fr. Ting nga ila kunong ihatud diri si Belciña sa Danao kay para mohatag og bail bond nga P200 mil. Hapon nalang wala pa," asoy sa polis.

Si Fr. Joey Belcina gikatahong nagtagotago karon human nalutsan og warrant of arrest sa kasong child abuse ni Judge Silvia Paderanga sa Regional Trial Court Branch 25.

Kahinumduman nga gibasura ang kasong "three counts of rape" nga giatubang ni Fr. Belciña sa usa ka 17 anyos nga babaye.