Waterfront police station sugdan na'g panday

Opisyal nga sugdan ala una karong hapon, Hulyo 1, ang katukuran sa bag-ong Waterfront Police Station 3 pinaagi sa groundbreaking ceremony sa luna sa may Legazpi extension, Fort San Pedro, barangay San Roque, dakbayan sa Sugbo.

Ang kalihukan pasiugdahan sa kagamhanan sa dakbayan sa Sugbo ug Cebu Chamber of Commerce and Industry.

Ang proyekto ubos sa Adopt-A-Police-Station Project tali sa kagamhanan sa syudad ubos nilang Bise-Mayor Michael Rama ug konsehal Procopio Fernandez ug sa CCCI kang kansang komitiba gipanguluhan nilang Jose Ng, Ted Locson ug Atty. Anastacio Muntuerto Jr.

Ang bag-ong buhatan sa Waterfront Police Station 3 gidonar kini sa VICSAL Foundation Inc. nga gipanag-iya sa banay'ng Gaisano nga gipanguluhan ni Jack Gaisano.

Samtang nag-abag sa maong proyekto mao ang mga negosyante nga sila si Rodrigo Go Tañeda, Robin Ong, Bonifacio Paray Jr., Atty. Macario Lim, Carlos Co, Felix Taquiam, Benjamin Akol, Ted Locson ug Sun Gold Marketing Corp. kinsa nipakita sa "Bayanihan Spirit" sa mga Sugbuanon.

Sa niaging tuig, ang Adopt-A-Police-Station Project malampusong nipabarug sa nindot ug hamugaway nga buhatan sa Mabolo Police Station 4 apil na ang Fire Sub-Station nga gigastohan usab sa Aboitiz Group Foundation, Inc.