97 ka PUJ drivers gipasakaa'g kaso sa Citom

Ang City Traffic Operations Management mipasaka og 97 ka kaso didto sa hukmanan batok sa mga drayber sa mga passenger jeepney nga nagbiyahian sa Mandaue nga ilang nadakpan nga misupak sa ordinansa nga nagdili sa pagpamasahero dinhi sa dakbayan sa Sugbo.

Ang maong mga kaso gipasaka sa kadagkuan sa Citom sulod lang sa milabay'ng duha ka semana human nga gipaspasan nila ang pagpatuman sa ordinansa 1837 nga gihimoan og kausaban sa ordinansa 2072 sumala pa ni konsehal Sylvan Jakosalem.

Ang kadagkuan sa Citom nga gipangulohan ni Executive Director Arnel Tancinco, namahayag nga napugos sila pagpasaka og kaso batok sa maong mga drayber kay bisan og sila gibauran, mipadayon gihapon sa pagpamasahero.

Ang 34 ka kaso gipasaka sa Citom didto sa Municipal Trial Court in Cities sa miaging semana, samtang ang laing 63 ka kaso napasaka didto sa hukmanan sa miagi pang semana.

Ang gihimong paghingusog sa Citom sa pagdakop ug pagpasaka og kaso batok sa mga drayber nga nagbiyahean sa Mandaue nga masakpang mopadayon pagpamasahero dinhi sa dakbayan maoy nakapahadlok sa daghan nang drayber.

Namatikdan nga duna pay mga PUJ nga nagbiyahean sa Mandaue nga padayong namasahero dinhi sa dakbayan apan pipila na lang kabuok bisan pa man og ang Nakahiusang Drayber sa Sugbo (NADSU) padayong miawhag sa pagpadayon pagbiyahe sa maong rota.

Ang bag-ong ordinansa gawas nga nagpahamtang og mas bug-at nga silot, nagtugot pa nga tanggungon ang mga sakyanan kun masakpan na kini makatulo ka higayon.

Ang tumong nga dili na tugotan nga mosulod dinhi sa dakbayan ang mga PUJ nga nagpanawan gawas sa syudad sa Sugbo mao nga dili na kaayo maghuot ang mga PUJ dinhi sa downtown.

Ang lagda mao nga adto na lang kutob sa mga accredited terminal ang mga PUJ nga nagpanawan sa gawas sa dakbayan.