P1.2m sa money changer nadala's tulisan

Usa ka messenger sa money-changer nga nahimutang sa usa ka mall sa Mango Avenue gitulis sa duha ka wala mailhing tawo kagahapon sa alas 11 sa buntag sulod sa parkingan sa maong mall.

Nakuha gikan sa messenger nga si Wilson Sabellano, 26, ulitawo nga taga Bulacao ning dakbayan, ang salapi nga nagkantidad og P1.2 milyones nga isip pundo unta sa Nikko Money Changer sulod sa Mango Square nga gipanag-iya ni Corason Yarcia.

Si Sabellano nga nahinabi sa mga tigbalita kagahapon miasoy nga gikan siya nag-withdraw sa naasoy'ng kantidad sa RCBC sa Fuente Osmeña sakay sa iyang motorsiklo.

Sumala pa niya nga giduol siya sa usa ka tawo pag-abot niya sa parking area ug dayong ingon nga "ambi nang bag nimo".

Matud niya nga nagdumili unta siya sa paghatag sa backpack nga diha sa iyang luyo, apan gitionan hinuon siya og armas nga wala matino ang kalibre tumong sa iyang nawong.

Sa karatol niya mihayang siya sa iyang motorsiklo ug nahigdaan niya ang bag nga iyang gisudlan sa naasoy'ng kantidad sa salapi.

Tungod sa pagdumili niya paghatag sa bag, gilabnot kini sa tawo ug dayong pusil ngadto kaniya.

"Gipusil ko pero wala siya makaigo, kaduha gyud, dunay kabhang sa bala duha kabuok," dugang asoy ni Sabellano.

Gibutyag niya nga nakabantay siya nga dihay motor nga kolor dark blue nga miagi sa iyang tungod samtang gitionan siya og armas.

Gibanabana si Sabellano ang wala mailhing tulisan nga nagpangidaron og 27 ngadto sa 30 anyos ug 5'3" ngadto sa 5'5" ang gitas-on, itumon ang pamanit.

"Kagahapon nag-deposit ko og 9,500 US dollars karong semanaha kay karon rako nakakuha og kwarta kay depende man gud sa kun mahutdan mi, pero usahay sa Lunes na," matud pa ni Sabellano.

Si Supt. Pablo Labra III, hepe sa Criminal Intelligence and Investigation Bureau sa dihang nahinabi sa Banat News miingon nga duna na silay suspek nga ilang gituohan nga maoy responsable sa pagtulis sa messenger sa money changer.

Si Frederick Mancao Ybañez, lumad nga taga Barracks Guihing, Hogohoy Davao City ug kasamtangan nagpuyo sa Barangay San Isidro Talisay maoy gidudahan nga miigo sa Nikko Money Changer.

Kahinumduman si Ybañez maoy gitumbok nga mitulis sa Free Will Corporation sa Bulacao niadtong miaging semana uban sa upat ka wala mailhing kauban niini nga nakadala og P76 mil.

Matud ni Labra nga iyang ipasusi ang tanang pier area diin adunay mga barkong mobiyahe paingon ngadto sa Mindanao, ilabi na sa Osamiz aron paglaang kang Ybañez.

Sumala pa ni Labra nga nagpadayon pa sila sa pag-ila sa mga kauban ni Ybañez nga miigo sa Free Will.