Peace education gitinguha sa elementarya, sekundarya

Giawhag ang Department of Education nga magbutang og linain nga subject nga "peace education" alang sa mga tinun-an sa elementarya ug sekondarya.

Si Konsehal Edgardo Labella, tsirman sa committee on laws, sa konseho sa siyudad sa Sugbo mopalabang og resolusyon alang ning maong katuyo-an.

Tinguha sa konsehal nga ibutang unya diha sa maong subject ang paghatag og hustong kasayuran sa mga tinun-an aron magpabilin kining mahigugmaon ug kanunay'ng maglikay sa kagubot aron mamahimo kining responsable sa katilingban.

Nakahunahuna si Labella nga isugyot ang pagbutang og subject alang sa peace education tungod kay daghan na kaayo karon sa mga tinun-an ang sagad nagumon sa dautang mga bisyo ug magpa-miyembro sa bisan unsang mga magkaribal nga fraternities.

Masaligon ang konsehal nga sa higayon nga ka-aprobahan ug mapatuman ang iyang gitinguha nga peace education maminusminusan na unya ang mga estudyante nga magligoyligoy sa pagtungha ug mokunhod sab unya ang mga panghitabo nga gilambigitan sa mga badlongon nga tinun-an.