Loot nasuko mga polis nag-drive sa police jeeps

Nasuko ang hepe sa Cebu Police Provincial Office, Sr. Supt. Vicente Loot human nasayod nga mga polis ang nagmaneho sa mga police jeeps nga gihatag ni Gobernador Gwendolyn Garcia sa kapolisan sa kalungsuran.

Matud pa ni Loot nga subay sa memorandum of agreement nga gilagdaan kaniya ug mga mayor sa kalungsuran ug sa gobernador, ang lokal nga kagamhanan ang mohatag og sibilyan nga drayber sa mga police jeeps lakip na sa maintenance niini.

Gibutyag ni Loot nga sa 36 ka police jeeps nga anaa karon sa kapolisan sa kalungsuran, walo niini ang gimaneho og polis.

Gipahibawo dayun ni Loot si Garcia labot sa iyang nasayran ilabi na nga gihimong rason sa ubang mayor nga wala silay ikasweldo sa sibilyan nga drayber.

Matud pa ni Loot nga anaa ra sa gobernador kon unsa ang iyang himoon sa hingtungdang mga mayor.

Gipasabot ni Loot daghang hunahunaon ang usa ka polis ilabi kon magtubag og alarma maong bintaha og sibilyan ang momaneho ug moatiman sa sakyanan sanglit wala kini'y laing hunahunaon gawas sa pagmintinar sa sakyanan.

Laing nakit-an ni Loot nga rason mao nga ang polis human sa paggamit sa sakyanan, biyaan lang kini inig abot sa buhatan gumikan kay mag-apas sa paghimo sa ilang report.

Karong Hulyo 4, laing 12 ka mga police jeeps ang ihatag na usab ni Garcia ngadto sa kapolisan sa kalungsuran pinaagi sa CPPO ilabi na niadtong mga lungsod nga wala pay sakyanan ang ilang kapolisan.