Pumar pasidunggan

World Boxing Council champion nga boksidor nga lumad nga nagpuyo sa dakbayan sa Lapu-Lapu hatagan og P300 mil ni Mayor Arturo Radaza isip pasidungog gumikan sa paghatag og dakong dungog sa maong dakbayan atol sa usa ka international fight didto sa Johannesburg, South Africa sa milabay'ng Marso.

Ang pasidunggan mao si Gabriel "Bonbon" Pumar nga maoy bag-ong WBC International Strawweight Champion niadtong Marso 31, 2006 didto sa Johannesburg, South Africa human iyang gipakamang ang Afrikanong kampyon sa maong away.

Si Pumar lumad nga nagpuyo sa Sitio Iba, Basak, Lapu-Lapu ug gani sa milabay'ng regular session sa konseho sa dakbayan sa Lapu-Lapu mitambong kini sa maong sesyon ug gipasidunggan sa mga konsehal.

Ang P300 mil kuhaon sa panudlanan sa mayor ug ang approval na lang sa konseho sa dakbayan sa Lapu-Lapu gihulat alang sa paghatag niini ngadto kang Pumar.

Atol sa maong sesyon gi-deffer lang una ang gahin niini gumikan kay wala makumpleto ang presensiya sa mga konsehales nga mitambong sa sesyon diin pito lang ang mitambong.

Hinuon sa sunod nga regular session posibleng mahatag na kang Pumar ang maong kantidad.

Samtang gikalipay usab ni Pumar ang paghatag kaniya og pasidungog gikan sa lokal nga kagamhanan sa Lapu-Lapu gumikan sa iyang kalampusan nga nahatag dili lang sa dakbayan sa Lapu-Lapu kun dili ngadto sa katawhang Pilipino.