Polis miisnab sa biktima gilabay ngadto sa SSG

Polis nga gireklamong wala motagad sa pagpangayo og tabang sa usa ka biktima sa pagpanguot sulod sa usa ka PUJ niadtong Hunyo 3 girelibuhan na gikan sa Pardo Police Station ngadto na sa Security Service Group sa Cebu City Police Office samtang gihimo na ang imbestigasyon.

Si SPO4 Jaime Repompo kinsa una nang miangkong siya maoy duty niadtong tungura gibalhin ni Senior Inspector Alexis Relado, ang hepe sa maong buhatan subay usab sa kamandoan ni Supt. Melvin Gayotin.

Ang Criminal Investigation and Intelligence Branch maoy gihangyo ni Relado nga paimbestigahon sa maong kaso aron paglikay nga dunay white wash nga mahitabo sa maong kaso.

Si Repompo gireklamo ni Rhodelia Caretero nga taga Mambaling ning dakbayan nga wala mokihol sa pagpangayo nilang duha sa iyang banang polis og tabang niadtong tungura, kini bisan na gani nasigpatan na nilang magtiayon ang duha ka mga suspek, giingnan hinuon sila ni Repompo nga sa Talisay police o sa Minglanilla police nalang sila padangpon o ba kaha sila'y mangunay og dakop sa mga kawatan.

Gumikan sa maong wala pagtagad gireklamo kini ni Caretero ngadto sa Malacañang hinungdan sa pagkaukay karon sa CCPO. Apan ning bag-uhay lang giingong mipahibalo si Caretero nga di na siya modayon sa iyang reklamo.

Si Supt. Pablo Labra sa CIIB sa pakighinabi sa Banat News mibutyag nga bisan pa man sa ka walay interes ni Caretero, padad-an nila og imbitasyon ang magtiayon aron pasumitihon og pormal nga reklamo "in affidavit form" alang sa ilang imbestigasyon.

Matud pang Labra nga di nila angayang palabyon ang susamang mga reklamo sanglit nakadaut kini sa imahe sa tibuok organisasyon.

Ang resulta sa imbestigasyon sa CIIB isumitir ngadto kang Gayotin uban sa rekomendasyon kun unsang administratibang silot ang ipahamtang kang Repompo kun mapamatud-ang duna kini pagkulang sa maong hitabo.