Kagahapon sa buntag mipatawag og tigum si Bise Mayor Michael Rama, tsirman sa Police Coordinating and Advisory Council (PCAC) ug gihisgutan ang umaabot niining ground-breaking sa Sabado sa alas 3 sa hapon.
Lakip sa mitambong sa maong gipatawag nga meeting ni Rama mao sila si Cebu City Police Office (CCPO) acting chief Supt. Melvin Gayotin, Konsehal Procopio Fernandez, tsirman sa committee on police ug ang hepe sa Waterfront Police Station.
Kasamtangang gibakante ang karaang buhatan sa Waterfront Police Station alang sa gitakda nga konstruksiyon ug ang temporaryong buhatan niini kasamtangang gibalhin diha sa barangay hall sa San Roque.
Matud ni Rama proyekto kini sa dakbayan nga gipaagi sa PCAC inabagan sa mga magpapatigayon sa Sugbo pinaagi usab sa Cebu Chamber of Commerce and Industry (CCCI).
Human unya sa katukoran sa Waterfront Police isunod nga bag-ohon mao ang karaan nga buhatan sa Taboan Police Station.
Ang Mabolo Police Station maoy unang nakabenepisyo nga gigastuhan sa Aboitiz Foundation ang katukoran sa bag-o niini karung buhatan.