Kinahon DVDs nasakmit sa BOC-Mactan sa MCIA

Tulo ka kahon sa DVDs nakonpiskar na usab sa mga sakop sa Bureau of Customs Port of Mactan, Customs Intelligence and Investigation Service, Enforcement and Security Service, Intellectual Property Unit, Aviation Security ug Optical Media Board atol sa ilang joint-operation sa mga bodega nga naa sa Mactan Cebu International Airport.

Base sa imbestigasyon CIIS-Mactan pinanguluhan sa hepe niini nga si Franz Muñoz, nga unang shipment miabot niadtong Hunyo 5 ning tuiga gikan sa kaulohan ug nasakmit sa PAL Cargo ang duha ka kahon sa DVD nga naka-consign sa ngalan nga John Mariano. Samtang niadtong Hunyo 15 laing kahon ang miabot ug gidala sa Galco warehouse gikan gihapon sa kaulohan nga naka-consign sa usa ka Janeth Lopez nga walay klarong address sa Cebu City.

Matud ni Muñoz nga dunay ilang nadawat nga impormasyon nga laing pagpayuhot na usab sa mga pirated DVDs ang moabot sa maong tugpahanan hinungdan nga nahimo ang joint operation sa Custom, polis sa MCIA ug sa OMB.

Ang maong kargamento ug tag-iya sa mga kinahon nga DVDs hatagan og 30 ka adlaw sa pagkuha sa maong shipment sa ilang buhatan apan hangtud karon wala pa magpakita sa ilang buhatan, sumala pa ni Muñoz.

Kun mapakyas si Mariano ug Lopez sa paglukat sa maong kargamento ang BOC hayan mapugos og isyu og warrant of seizure and detention (WSD) batok sa mga kahon ug himuon usab ang tukmang imbentaryo alang sa pagdeterminar kun kini mga pirated disk ba ang sulod niini.