2 Koreano nangulata'g 2 babaye

Duha ka mga Koreano ang gipasanginlang nangulata sa duha ka mga babaye sa managlahing dapit dinhi sa dakbayan sa Sugbo sa kaadlawon kagahapon ug niadtong milabay'ng adlaw.

Usa ka James Park, 38, minyo, lumad nga taga South Korea ug temporaryong nagpuyo sa 19th street, Doña Rita, Talamban ning dakbayan gireklamo sa usa ka Gemma Orsua Mendez, 18, taga dalan Juana Osmeña Extension, Camputhaw ning dakbayan.

Sumala pa sa imbestigasyon sa kapolisan sa Fuente Police Station nahitabo ang pagpanukmag diha sa Viking Midnight Sun Bar sa dalan Mango Avenue diin ang suspek lango na kaayo sa ilimnong makahubog niadtong Miyerkules sa kaadlawon.

Gikatahong miduol ang suspek kang Mendez ug kalit nga gibitad ang bukton niini ug dayon gituok.

Dihang nagkisi-kisi si Mendez kalit siyang gitukmod sa suspek diha sa sawog hinungdan sa pagkapakong sa ulo sa biktima sa sementadong salog.

Ang gwardiya nga si Champe Agua nga maoy nagbantay sa maong bar daling midakop sa suspek uban kang PO2 Alvin Llamedo sa Mobile Patrol Grop kinsa miresponde sa alarma.

Ang suspek gidala sa Cebu City Medical Center ug gipailawom sa liquor test diin migawas nga positibo kining hubog.

Kasong physical injuries ug paglapas sa City Ordinance 1929 kun Drunkiness in Public maoy gipasaka batok sa suspek.

Kagahapn sa kaadlawon laing Koreano ang gireklamo'g pagpangdagmal sa usa ka 18 anyos nga babaye diha sa sitio Bagong Buhay, Carreta ning dakbayan.

Usa ka naila lang sa pangalan nga "Hugo" nga Koreano ang gipasanginlang kalit nga misukmag kang Janice Ortiz, residente sa maong dapit.

Matud pa sa biktima sa Waterfront police station miduol kaniya ang suspek ug walay igong hinungdan gisukmag siya niini sa tuong bahin sa iyang nawong hinungdan sa pagkabukol niini.

Daling miikyas ang suspek human sa insidente ug padayon pang gipangita sa kapolisan.