20-anyos nakit-an nagbitay sa nangka

Usa ka 20 anyos nga ulitawo napalgang nagbitay ilawom sa punoan sa nangka sa ilang umahan diha sa bukirang barangay sa To-ong ning dakbayan niadtong Martes sa buntag.

Wala nay kinabuhi nga nakit-an si Jay-R Ebonalo,20, mag-uuma sa maong lugar.

Sumala pa ni PO3 Rogelio Nedamo sa Homicide Section sa pakighinabi sa Banat News niadtong Martes nga naghubog-hubog pa si Ebonalo uban sa iyang mga higala ug mga kabanay niadtong Domingo, gikatahong una pa kini nakig-inom gikan kini namisita sa iyang uyab.

Dangtan pila ka gutlo nananghid na kini sa iyang mga kabanay ug misugilon sa iyang amahan og pagpangayo og pasaylo kay mouna na kini og pauli sa ilang balay.

"Mibabay-babay paman gani daw ning biktima sa ila (kainom) kay mouna na lagi kuno siya," asoy pang Nedamo.

Sumala pa sa amahan sa biktima nga nananghid kanila ang biktima sa pag-ingon "Mouna nalang ko ninyo 'tay ug pasayloa ko ninyo," sumala pa sa biktima.

Sukad niadto wala na nila makit-i si Ebonalo hangtud ang iyang igsuon nga si Edwin,33, misuway og subay sa ilang umahan sa pagdudang adto lang kini nagtago apan patay na niya kining nakit-ang nagbitay sa punoan sa maong nangka.

Walay nakitang foul play ang kapolisan sa lawas sa biktima.

Kini maoy ikatulong hitabo nga dunay naghikog dinhi sa dakbayan sa Sugbu sulod lang sa duha ka semanang milabay, niadtong milabay'ng Hunyo 25 sa kaadlawon usa ka ginang nga si Darlina Genon, 52, ang naghikog sulod sa ilang banyo diha sa Calamba ning dakbayan ug niadtong Hunyo 25 usa ka 17 anyos nga batan-on ang naghikog nga giilang si Ricky Cabual sa Talamban.