Akrho gipatay atubangan sa tunghaan

Usa ka gikatahong sakop sa Alpha Kappa Rho fraternity ang gipusil diha mismo atubangan sa ilang tunghaan sa Cebu Institute of Technology sa dalan N. Bacalso ning dakbayan niadtong Martes sa hapon.

Samdan sa iyang agtang ug tuong pulsohan ang biktimang si Mc Dofilo Mayol, 21, tinun-an sa kolehiyo sa maong tunghaan ug kasamtangang nagpuyo sa La Teresas, Labangon ning dakbayan.

Tulo ka mga lalaki diin usa kanila naila lang nga Glenn nga gituohang mga sakop sa Tau Gamma Phi ang gitumbok nga mipusil kang Mayol.

Sa imbestigasyon sa Homicide Section natino nga naglakaw ang biktima uban sa iyang higalang si Christian Ariar pauli sa ilang pinuy-anan dihang kalit nga giatangan sa tulo.

Usa kanila ang giingong armado og wala matinong kalibre sa armas ug kalit nga mipusil kaniya makaduha ka higayon hinungdan sa pagkaigo diha sa iyang agtang (tapsing) ug sa tuong pulsohan.

Daling nanagan palayo ang mga suspek samtang gitabang ug gidala si Mayol ngadto sa Cebu City Medical Center.

Kahinumduman nga tulo ka adlaw sukad nagsugod ang adlaw sa klase nakadawat og suwat reklamo si Supt. Melvin Gayotin sa Don Vicente Rama Memorial Night High School sa Basak ning dakbayan gumikan sa presensya sa mga fratman ug mga gang members diha sa ganghaan sa ilang tunghaan.

Si Gayotin mimando sa tanang police station sa pagbutang og polis sa tanang mga tunghaan sa ilang hurisdiksyon.