Loot dakong uyon armasan ang mga tawo

Dakong uyon ang hepe sa Cebu Provincial Police Office, S/Supt. Vicente Loot, nga padalhon og armas ang mga sibilyan nga makapanalipod sa ilang kaugalingon.

Ang pamahayag ni Loot isip reaksiyon sa tinguha karon sa Volunteers Against Crimes and Corruption nga makadala og armas ang mga sibilyan.

Ang tinguha sa VACC namugna human hingpit na nga gipapas ni Presidenti Gloria Macapagal Arroyo ang Death Penalty Law.

Apan matud pa ni Loot nga kinahanglan gihapon nga tumanon sa mga sibilyan nga may mga armas ang lagda sa pagkupot niini aron dili mag-atubang og problema.

Gipasabot ni Loot nga basta mopasar lang sa kwalipikasyon ang usa ka tawo nga mokupot og armas mahimo na kining padalhon og armas.

Apan siya nipahimangno sa tulubagon sa tag-iya kon malapas ang balaud ilabi na kon dili makamao mogamit sa armas.

Ang VACC nagtinguha niini aron ang matag usa ka tawo mao nalang ang manalipod sa tagsatagsa ka kaugalingon nunot sa ilang pagtoo nga mogara ang mga kriminal sa pagkakaron nga wala na ang balaud sa silot sa kamatayun.

Target sa VACC sa ilang kampanya mao ang mga kriminal nga mobiktima sa mga inosenting tawo nga walay ikasukol panahon nga sila biktimahon gumikan kay walay armas nga ikasukol.