Ang Campo Crame mimando sa Police Regional Office PRO-7 pagsusi sa report nga ilang nadawat pinaagi sa text message nga si Alcover nagplano sa pagpapatay kang Mayor Tomas Osmeña, Naga Mayor Valdemar Chiong, PRO- 7 Chief Silverio Alarcio ug kang NBI Director Medardo Delimos.
Matud pa nga kauban ni Alcover sa pagplano mao ang kapitan sa Inayagan Naga nga si Narciso "Boy" Tablate.
Apan si Alcover atol sa interview sa usa ka sibyaanan dinhi sa Sugbo miingon nga klaro kaayo kining propaganda sa walhong pundok nga iyang giisip nga numero uno niyang kaaway.
Si Alcover nga kanhi rebelde batok sa gobiyerno ug karon usa na ka Anti-Communist Crusader nagkanayon nga segurado siya nga mga rebelde maoy nagtumotumo ug nagpagawas sa maong balita tungod kay naglagot kini kaniya tungod sa iyang hugot nga kampanya batok sa insuriksyon.