Tunghaan gilungkab

Bisan tunghaan wala pasayloa sa mga kawatan human gilungkab ang administration building sa ikaduhang andana sa University of Southern Philippines diha sa dalan Salinas Drive, Lahug ning dakbayan niadtong milabay'ng Lunes sa gabii ug gisakiyo ang kapin P143,000 nga salapi.

Sa imbestigasyon sa Theft and Robbery Section pinanguluhan ni SPO4 Isagani Pugoy mitumaw nga diha miagi ang wala pa mailhing kawatan sa pultahan pinaagi sa paglungkab niini ug miabli sa mga drawers nila ni Dr. Athea Rodriguez Arenaro,49 ; Dr. Lucila Samero Bonilla, 62, ang dean sa College of Education ug lamesa usab ni Daniel Patete Lariba Jr. ang dean sa College of Arts and Sciences.

Sumala pa sa imbestigasyon posibleng gigamitan sa suspek og gunting ang paglungkab sa pultahan sanglit dunay gunting nga nakit-an diha sa crime scene.

Ang mga salapi sa mga biktima diha ra gibutang sa drawer apan nadiskubrehan kini pagkabuntag na sa mga kawani nga mi-duty.

Pila ka oras una pa ang pagkadiskubre usa ka Peter Paul Perosillo,34, nga stay-in maintenance sa maong tunghaan ang gidakop nila ni Retired Army 2nd Lieutenant Rodulfo Angue ang security supervisor sa maong tunghaan dihang nasigpatan kining dunay gisukbit nga kalibre 45 nga pistola nga may usa ka magazine nga dunay lima ka buhing bala.

Walay dokumento nga napakita ang suspek hinungdan sa iyang pagkasikop. Gisusi na karon kung unsay koneksyon sa maong suspek diha sa pagpanglungkab.