50 ka karera wa mahinayon pagbungkag

Wala mahinayon sa pagbungkag kagahapon ang 50 ka video karera machine sa dakbayan sa Mandaue tungod sa kapakyas sa pagtambong ni PNP Chief Superintendent Silverio Alarcio, direktor sa Police Regional Office 7.

Si Mandaue City Police Director Eduardo Catabas mitakda unta sa pagpaguba sa maong gidaghanon sa mga video karera machine atol sa flag ceremony niadtong miaging Lunes sa buntag.

Apan wala makatambong si Alarcio nga maoy hinungdan nga si Mayor Thadeo Ouano misugyot nga itakda na lang sa laing adlaw sanglit labing mahinungdanon usab nga makasaksi niini si Alarcio.

Gipasabot ni Ouano nga labing gikinahanglan nga masaksihan sa kadagkuan sa kapolisan sa rehiyon ang pagpangguba sa mga karera aron usab ilang masayran ang mga nahimo sa kapolisan sa dakbayan.

Si Catabas miingon nga labi pa gyod karon nilang gihingusgan ang pagsumpo sa tanang ilegal nga kalihukan.