ID system tinguha ipatuman sa Mandaue

Higpit gyod nga nagtinguha si Mayor Thadeo Ouano sa pagpatuman sa ID System sa kabarangayan alang sa pagmentinar sa kahapsay ug kalinaw.

Kining mao niyang tinguha alang usab sa paghatag og kasiguroan sa mga lumolupyo nga dili masudlan sa pundok sa dautang elemento sa tulisan, terorista ug sparrow unit sa New People's Army.

Sa nasayran sa Banat News kang Mandaue City Police Director Eduardo Catabas nga higpit nilang gipalig-on ang ilang pagbantay sa mga vital installations sa Mandaue.

Matud pa niya nga ang Marcelo Fernan Bridge ug Mactan Mandaue Bridge adlaw ug gabii nilang gibantayan pinaagi sa pagdestino og mga sakop sa kapolisan sa pagpatrolya sa maong lugar.

Ang Bridge Police Patrol nga sakyanan nga gihatag ni Gobernador Gwendolyn Garcia maoy gihimong service vehicle sa pagpatrolya sa kapolisan.

Dugang pa ni Catabas nga ang higpit nga pagbantay sa kapolisan ang iyang gipatuman bisan kaniadtong wala pa ikataho ang pagsulod sa mga terorista ug sparrow unit dinhi sa Sugbo.

Giklaro ni Catabas nga dako kaayo ug ikatampo alang sa pagbantay sa kahapsay og kalinaw sa dakbayan ang pagpakighiusa sa mga lumolupyo.