Vidal di mosupak nga sam-ang himuong socialized housing project

Si Arsobispo Ricardo Cardinal Vidal dili supak nga ang karaang menteryo nga nahimutang sa barangay Lorega-San Miguel himuon na nga socialized housing project.

Ang legal counsel sa Archdiocese of Cebu nga si Joel Ouano namahayag nga si Cardinal Vidal dili mosupak kon ang maong tinguha gitumong alang sa kaayohan sa kadaghanan.

Sayo pa ang City Hall pinaagi ni Engr. Danilo Gabiana nga maoy hepe sa Division for the Welfare of the Urban Poor (DWUP) nagpakisayod sa Cardinal kon wala ba kini'y pagsupak sa laraw nga himoong socialized housing project ang sam-ang sa Caretta.

Ang abogado sa artsidyosisis sa Sugbo mipasabot nga ang Cardinal dili gayod mosupak kon ang usa ka lakang gitumong alang sa kaayohan sa kadaghanan.

Si city health officer Dr. Fe Cabugao mipasabot nga dili sila maoy makahatag og tukmang baruganan kon angay ba nga i-convert nga housing project ang karaang menteryo nga nahimutang sa Lorega.

Apan gitataw ni Cabugao nga ang lagda nga gilatid sa Sanitary Code mao nga ang local health officials makahimo sa pagrekomendar pagpatak-op sa usa ka menteryo kon masuta nga ang pagpadayon sa iyang operasyon makahatag og dugang kadaut sa katawhan.

Gitataw ni Cabugao nga ang pagpatak-op sa usa ka menteryo ug pagwagtang niini sa usa ka dapit, gitahas ngadto sa mga sakop sa konseho sa usa ka lungsod o kaha dakbayan diin ang menteryo nahimutang.

Ang mga nagpuyo sulod ug palibot sa menteryo sa Lorega-San Miguel mihangyo nga unta ang maong dapit nga ilang gipuy-an ideklarar na nga socialized housing project aron nga dili na sila mameligro nga mapapahawa sa ilang nahimutangan.

Ang maong sugyot padayon pang gitun-an sa mga sakop sa konseho sa dakbayan sa Sugbo.

Nahibaw-an nga ang maong menteryo napahimuslan na lang sa pipila ka banay kay kadtong nakauna sa paglubong sa maong menteryo wala na mohabwa sa ilang mga gipanglubong ug nahisama na nga gihimo nilang private cemetery ang maong sam-ang.