Tom di mopasaylo sa 'texter' ni Margot

Dili makapasaylo si Mayor Tomas Osmeña ngadto sa kanhi kawani ni kanhi Mayor Alvin Garcia nga iyang higpit nga kaatbang sa politika nga nagbugalbugal sa iyang asawa nga si Margot pinaagi sa pagpadala og mga bastos ug mga pagpanghulga nga text messages panahon sa kampanya sa piniliay niadtong tuig 2001.

Gipadayag kini sa mayor human makadawat og report nga nagplano si Jonah John Rodriquez nga mobisita sa iyang buhatan sa Cebu City Hall aron sa pagpangayo og pasaylo kabahin sa maong panghitabo.

Kini human mibali ang desisyon ni Rodriquez ug mi-plea guilty kini sa kasong grave threats nga gipasaka ni Margot sa sala ni MTC Judge Mamerto Coliflores atol sa hearing niini niadtong miaging adlaw.

Si Rodriquez miangkon nga nahimo niya ang pagpadala og bugal bugal nga mga text messages ngadto sa kapikas sa mayor tungod sa iyang sobra nga paglaban sa iyang amo nga si Garcia.

Apan matud ni Osmeña usa lang ka publicity ang gihimo ni Rodriquez ilabi na kay gibati na kini og kahadlok tungod kay dako ang kahigayonan nga mapildi man kini sa maong kaso.

Gitug-an sa mayor nga human sa maong gibuhat ni Rodriquez mikunsulta kaniya ang iyang asawa ug nangutana kun unsay buhaton apan iya kining gisultihan nga "ablihi og balik ug tan-awa ang mga bugalbugal nga text messages".

Alang sa mayor mas maayo nga paabuton na lang ang ipakanaog nga desisyon sa korte kabahin ning maong kaso.

Si Garcia maoy mibarog nga abogado ni Rodriguez.